Humoreski śląskie

powrót :: strona główna

Abrahamowy gyburtstag Jako żech jest niypoważnym cowiekym robiącym we poważnym Radioku Piekary , to ludzie mi posyłajom doś dużo listkow , niyftore z wyraźnom prośbom coby je bez cedzitko przecytać. Możno i jest to dlo nich ważne , a że ze suchaczami jo fest sztimuja ,toch niy mog tego łodmowić Zeflowi z Zołęski Hołdy , wtory przisłoł mi taki listek: Roztomiły Jorgusiu ! Bardzo bołbych rod jakby tyn listek dało się przecytać we radioku. Miołech łońskigo tydnia Abrachama i dostołech dużo życyń i gyszynkow. W doma zrobiołech hic jak pieron, znacy się fajer stomilioński. Chciołech za pośrednictwym naszego radioka piyknie podziękuwać wszystkym, wtorzi się do moi impreze przicyniyli. Nojsomprzod , to piyknie dziękuja tym co ło mie zapomnieli i u mie na fajerze niy byli. Tym zawdzięczom nojwiyncy, bo jak u mie niy byli , to mi niy wraziyli kwiotkow do akwariuma ze rasowymi welonkami i skalarami. Niy wiysalii mi tyz ancugow na krołnlojchtrze i fuzekli do suszynio po kompaniu we sekcie i tyz mi niy napaskudziyli do kriształowych pucharow coch dostoł za piyrsze miejsce we flugach. Żodyn śnich mi niy przeloz bez szklane dźwiyrze do paradny izby bez ich łotwiyranio i żodyn śnich mi niy wstawioł do mikrowele czewikow do suszynio. Niy mogą tyz pedzieć ,że ci co do mie niy prziszli na moigo Abrachama - przeniyśli mi bifyj do badywanny we łaziynce coby go umyć jak się pokidoł szekuladowym ajerkoniakym i tyz mi niy wraziyli naszego Amika do waszmaszyny , bo tyz boł trocha pokidany tym samym ajerkoniakym. Jesce by boło pora drobnych spraw , wtorych mi niy zrobiyli , jak na tyn przikłod: niy łopakuwali moi stary we blank nowy lojfer z gyszynku i niy wyniyśli jom na gora , bo ponoć fest pyskuwała ( dobrze ji tak !) Teroz chciołbych podziękuwać tym co u mie byli na fajerze za to ,że mi łostawiyli jedyn niyszczaskany hoker i rycka po Staroszku i że mom jesce kaj miyszkać , choć pomiyszkanie jest bez drzwi do antryja i bez trita , ale to się kupia za zrewaluryzuwano pynzyjo jak pospłocom na bezrok zalone Kowolicce pomiyszkanie podymnom. Wyciepnionych na plac gardinsztangow niy byda wytykoł , bo mi się i tak już niy podobały, choć szkoda, że przed wyciepuwaniym ich na plac niy łotwarli łokyn. Szyby poleciały mit. Mom jesce kaj miyszkać , choć te gidy ze spońdzielnie napisali take protokoła , wtorych wcale niy rozumia i przisłali mi to jakymś brifym dokupy ze wiadomościom ło ekszmisji. Łobiecuja ,że tych wszystkich , wtorzi u mie byli na Abrachamie zaś zaprosza na fajer za następne 50 lot. Panie Jorgusiu przecytejcie to mojym przocielom, bo coś jym sie noleży. Zefel Kręcik z Zołęski Hołdy Do gazyty zapodoł Jerzy Komor vel Jorguś Rzympoła

powrót :: strona główna

Gorki śniyg Juz sie wiosna niyśmiało melduje do dźwiyrzi cynstszym dmuchaniem cieplejszego luftu. Ino patrzeć jak przilecom bociany. Ponoć jedne radio podało,że te ptocyska juz na jejich banhowie we Afryce ustowiajom sie w raji po bilety do Polski.Nasze poćciwe wrobliki-te skrzidlate myszy polskigo nieba- wrzescom juz coroz gośni, zaś wrony i gawrony dostowajom rajzyfibru,bo miarkujom ,że musom tyz trocha na połnoc chnet łodlecieć . Ale co ta zima -choć krotko -napocwioła,to napocwioła. Godajom filozofy,że prziroda mo wpływ na życie codziynne ludzi. Może i mo ? Jo tego tak gynau niy widzioł, ale po tym co mi połosprawioł Ignac widza juz wyraźni. Boło tak. Na daleki wsi-skond Ignacowo Babecka pochodzi - rychtuwali sie do weseliska, wtore miało być zaroz we piyrszo sobota po Nowym Roku. Miarkujecie jak we familiji mo być wesele, to wszystko musi być wyrychtuwane jak we zygarku.Mszo i ślub we kościele parafialnym już downo ze farorzym uśtiftuwane,gorzołka typu KPN połozlywano do flaszek,wieprzki zabite,wszystko śnich zrychtuwane,rymizyjo we miejscowy fojerwerze postrojono,kapela insztrumynty przedmuchała, goście uwiadomiyni wceśniejszymi zaproszyniami a co nojważniejsze, modzi napolyni ku sobie az jedna uciecha. Niyszczęście zacło sie juz zaroz we Nowyrok jak posypało śniegym cego nojstarsi ludzie we wsi niy pamiyntali. Goście zamiejscowi niy dojechali, doszło ino pora telegramow a to tyz ino bez dwa dni Nowego Roku, bo potym poczta padła skuli przerwanio drotow na masztach. Godo sie,że niyszczęścia chodzom porkami,mie sie zdo że cołkymi chmarami.Bo wystowcie sie dali: we weselno sobota boło tam tela śniega, że modzi nawet na rołdlach z porom koni niy mogli dojechać do farnego kościoła. Jakoś tak pod wiecor docołgali sie nazod do dom,ale zmaltretuwani bez tyn śniyg do imyntu.Śniymi starostowie i starościny we klajdach, wtore juz na żodne wesele sie niy nadowały. Jak wleźli do izbow, to musieli zarozki szukać świycek, bo śtromu niy boło. Jak Modypon poświycoł świyckom swoi wybrance na słodach, to ze nerwow zrobioł to tak maszkytnie ,że spoloł ji kyns szlajera,jak to uwidziała jego prziszło świgermuter, to skocoła dziołcha retuwać, śleciala ze słodow i złomała sie noga,ale nim to sie stało wiadome,to przitomni tym mecyjom dwaj drużbowie (szkolone fojermany) przejyli inicjatywa p/pożarowo- i zagasiyli polący sie szlajer ale juz śniego hajcła sie gardina we paradny izbie.Jedni familianci gasiyli gardiny a inksi szukali i zapolali świycki coby sie mogli porozglondać po izbie. Wystowcie sie jaki to boł rejwach w chałpie. Po kwilce jednak wszystko boło łopanuwane ino Modopani niy nadowała sie juz do pokozanio gościom,co nojwyży Modymu Panu a i to ino bez łopakuwanio, ło cym za kwilka. Noroz zrobioło sie jasno we izbie ,ale niy skuli łodzyskanego sparcio ze elektrownie ino skuli flamy z za łokyn. Wejrzeli coz to sie tak jasno świyci i zaro po kwilce juz wiedzieli. Poloła sie remizyjo fojermańsko we części kaj mioł być bol weselny. Nowe niyszczęście zaćmiywające w skutkach spolony szlajer,gardiny i - z pełnym uszanuwaniym - złomano gyra niydoszły świgermutry. Myslicie sie ,że to juz dopełnioło miarka niyszczęścio domu weselnego? Niy tak drab. We remizyji na stanowisku heitzra boł taki trocha ślywok. Mioł polić we piecach coby gościom weselnym boło ciepło i za ta robota mioł juz nachttryjtlich wypłacone weselnom gorzołkom. Społnioł te obowiązki z wielgym cugym,poloł we piecach i we swojym organiźmie, skutkym cego na podłoga wylecioł glut i ... i dalszo sprawa juz znocie. We remizyji boł cołki forant kustu weselnego i okowity weselny. Straty boły przełogromne.Ślubu niy boło,weselo niy boło,ze wszystkym boło by po ptokach , ale pod wiecor na koniu przirajtuwoł do weselnego domu farorz i doł modym ślub. Wtajymniczyni z familije Ignaca, wtory mi to połosprawioł godajom,że boł cichy ślub i nastąpioło skonsumuwanie małżyństwa, bo choć fojermany ze wsi remizyjo ugasiyli, to ugasić rozpolonych chuci Modych Państwa niy byli we sztandzie. Aby tela zysku. Tak to widzicie jak to zimny podmuch śnieżny zimy poradzi rozpolić to co sie polić niy powinno.

powrót :: strona główna

Tragiczny koniec zolytow z Anom Musa Wom sie prziznać do bardzo rozbuchanego życio erotycznego w moji modości. Juz za take wyznanie powiniyn mie farorz wygnać ze wsi. Ale nim do tego dondzie, to powiym jak na sońdzie jak boło z mojymi lipstami. Miołech ich doś pora , bo az trzi. Z tego dwie mie niy chciały za szaca a trzeci jo niy chcioł,bo niy umiała warzić zuru. Ale po za tym zurym, to jo tam taki wybiyrny niy boł. Wszystke mi miały za złe, żech boł małym kurduplym,bo wystowcie sie meter piędziesiąt w hucie i niydzielnych trzewikach.Cyja to wina ? Moja niy ! Wojynny rocznik,witamin wtedy jesce niy znali, a jak znali to niy boło moich łojcow stać na nie. Na rośnięcie ,to nom dowali w szkole tran ze unry.Co to jest tran ,to wiycie pra ?A co to boła UNRA? Pamiynto wtoż z Wos? Tran tyz boł na dobro pamięć. Jakzeście niy piyli tranu,to możecie niy pamiyntać co to boła UNRA,toz Wom przipomna! To boła tako ciotka zagraniczno, ale fest zagraniczno, bo az ze ameryki. I ta zagraniczno ciotka przisyłała nom pakyty ze kustym. W pakytach boły take maszkyty jak:bonkawa,cwibaki,kołkusfloki, mandle, apluziny, suszone śliwki i szekulada. Te dwie łostatnie rzecy, to miały przeciwne działanie. Suszone śliwki robioły durchwal a szekulada go sztopuwała.( to boła tako medyczno akcja). Nojważniejszech niy pomiynioł, we pakytach boł tran. Jo go pokornie z zawrzitymi ślypiami łykoł boch chcioł urosnąć alech niy uros skuli Antka. Powiym jak boło. Żech grzecnie z wielgom mękom pioł tran, to juz wiycie, ale do casu az mie sie keś na placu spytoł Antek -dwie klese wyży - tak : - Jorguś pijes tran? Pija pedziołech ze niyjakom dumom w gosie,bo to miyndzy dzieckami niy boło zwycajne, a wtedy Antek nazwoł mie świniom. Łod tego pognębiynio moralnego niy piołech juz tranu i bez to myśla Matulce Jorguś niy uros i szlus na tyn tymat, bo to mie sztresuje. Miołech godać ło mojym rozbuchanym życiu erotycznym.Że to boło -życie erotyczne, toch wtedy niy wiedzioł,bo skond ? To mi prziszło potym, a po cym, to tyz tak gynau niy wiym. Toz miołech tako lipsta z Kaminerki -Ana. Kaminerka, to boła gowno ulica ze srogymi domami co wiodła do Kamynia a we tych domach miyszkali bogatsi ze łoknami pomaluwanymi na bioło i łokna ze paradnych izbow wychodzioły na Kaminerka a łokna ze kuchniow na plac i tyz boły pomaluwane na bioło. We naszym familoku boły łokna zielone abo cerwone,taki sznit. Toz we takym jednym łoknie wypatrzołech ta Ana i fest mi sie spodobała. Miała corne wosy jak cyganka,ale niom niy boła,bronotne gryfne łocka,nosiła sie na cerwono i miała fajnisto damka. Damka bydzie tu nojważniejszo, ale to za kwila. Nimech ta Ana przekonoł,by zymnom posjyruwała, toch sie fest nastarać musioł. Pomogła mi w tym jeji romantyczno natura. Tyz dużo do rzecy miała i moja romantyczno natura,wtoro się objowiała w tym,żech Anie pisoł fajne rymuwanki ło byle jakich gupotach,jako to ło kwiotkach pachnących,szmaterlokach,miesiącku śrybnym,gwiozdach i ło tym podobnych duperelach. Pojechali my roz we jedna niydziela na Bizyjo do lasa. Jo przed tom jazdom dwa tydnie naprawiołch moje koło.Gysztel pomaluwołech cornom farbom,zic łobszoł szmatom ze staroskowego rukzaka, szlauchy polepiołech ganc gynau ale nojgorzi bołe ze mojymi szprychami, bo trza boło je wycyntruwać a tegoch niy poradzioł. Sztefański mie wyciep z warsztatu, bo felgi boły drewniane i takich sie juz niy dało wycyntruwać. Poskręcołech je jak poradzioł, ale dupom, to mi podciepuwało. Jechać sie dało. Pojechali my z Anom na ta Bizyjo. Ana na ty swoi spaniały nowy damce. Co to boło za cudo? Znacy sie - ta damka. Jesce dziś jak zawrza łocy, to jom widza !! Niybieski gysztel, cerwone szucblechy,niklowe pyndale, corny gypektryjger,na zadniym kole sztrykuwany nec, lampa na dynamo (jo mioł ze karbidki) ,niklowy zwonek i dwie brynze:przodnio i zadnio. Coz jesce widza jak zawrza łocy? Zic ze prowdziwy skory i nikluwano luftplompa. Moja haspel przi ty damce wyglondoł jak bergorz przi biskupie. Jechali my na ta Bizyjo, a ludzie ,to sie az za nami łoglondali. Myśla,że za tom damkom, co? Rozłożyli my sie bykwyjm we gynstych krzokach,bo jakby doszło do całuwanio, to nos dekuwały, skuli tego,że Ana boła doś wstydliwo. Leżała sie ta moja Ana na dece we fajnych kwiotkuwanych szatach i zdjona ino ze nog biołe tunki, bo jom uwiyrały. Jo ruszoł w cug.Znacy sie cytołech Anie moje gupie rymuwanki ło dwuch szmaterlokach co sie gonioły i sie noreszcie dogonioły. Jo tak szczyloł łocami,roz na Ana a dwa razy na jeji damka. Cytom te gupstwa ale myśli moji wybujały wyobraźni krążoły ino wele ty damki. Ana tyz boła fajno. Wystowcie sie jescech zapomnioł pomiynić,że szprychy tyz miała nikluwane. Znacy sie damka! Miarkujecie ? Tyn romantyczny nastroj jakich wytworzoł w tych krzokach wele damki i Any boł strasznie rajcujący. Na efekt niy trza boło dugo cekać. Noroz ta moja Ana położoła sie na plecach,szaty ji sie trocha dźwigły, rozłożoła rynce jak do łobłapianio i pado mi : - Jorguś!! - A coz kces Ana? - Jorguś, moj nojmilejszy! Mie sie az adrenalina wyloła do żył. Gawca sie trocha na Ana a barzi na ta damka we wtory nikluwanych tajlach rozkosznie poblyskiwało słonecko. Coby jesce wzmoc tyn nastroj czarowny a podnietliwy,toch ledikatnie pobrząkuwoł zwoneckym ze damki, a rozdygotanymi z podniecynio rękami głaskołech skorzany zic i jesce krwawo czerwiyń szucblechow tyz żech głaskoł. Trocha mi w tym opisie wyszło za dużo rąk, ale boło jak godom,bo tak mi sie zdowało. Ana rozłożono na dece,szaty juz sie blank wysoko podniosły,az do samych szpicek ze ślipfrow,(boły niybieske),a mie z gymby wylatujom kwiotki,gwiozdki,farbkuwane tęcze nad potockym i niyzapominajki z niybieskym łockym zice skorzane z światlistymi refleksami odbijanymi w nikluwanych tajlach damki wszystko sie kręcioło w upojnym tańcu tysięcy szmaterlokow i paniynki we łocach Any łozszyrzoły sie do granic wysublimuwanego uniesiynio i Ana trzęsocym gosym pado mi: - Jorguś,Jorguś!! Musiołech sie na kwilka łoderwać myślami łod ty damki i pytom sie Any: -Cegoz kces? A łona mi w nojwyższym miłosnym uniesiyniu prawi: - Jorguś, bier ,co Ci nojdroższe! Toch bez chwile namyślonku wzion ta damka i łodjechołech ze Bizyje. Jesce tego samego dnia Ana poszła na policyjo i zapodała,żech ji ukrod koło. A przeca boło cołkym inacy. Daliście pozor jakech wiod te spomniynia? I tak sie tragicznie skońcoły moje zoltyty ze Anom z Kaminerki. Została mi ze tego falu tako mondrość życiowo:ze kobiyty nigdy nie idzie zadowolnić! Jerzy Komor vel Jorguś Rzympoła

powrót :: strona główna

Świniobicie Połosprawiom Wom jak to moi łojcowie świniobicie roz sprawiyli. Uprzedzorn lojalnie,że bvdzie to łosprowka okrutno kaj krew bydzie pyrskać az jedna uciecha. Ci co som wraźliwi to niych niy suchajom, abo przinojmni niych sie wyrychtujom sroge sznuptychle. Boło tak: nojsamprzod to Łociec ze Matulkom poszli no targ coby łod handlyrza kupić świnia abo wieprzka, co skuli mie na jedno idzie. Kasztuwało to świniorzisko dużo abo i jesce wiyncy.Mie zaś kozali we chlywiku wymaścic słomom fajne,lygowisko,by ta świnia rniała bykwyjm coby sie fajno spyrka robioła. Jok juz ta świnia zacła sie we chlywiku roztopiyrzać no to my jam zacli cichtuwać,co sie przekłdodo no polski - dobrze futruwać. Do futruwanio to sie nodowojom nojlepi: pomyjej, klosconka, melka , kortofle ze śrotym i tym padobne delicyje. Take futruwanie to two poł roku jak świnia dobrze zre a jak niy chce zrić to i bez trzićwierci roku trza ji maścić. Przi futruwaniu to trza sie do ty świnie porzomnie łodzywać a niy tak po grubelacku jak do swoi Baby abo do somsiada ;świnia tego niy ciyrpi. Jak juz świnia boła dobrze spasiono i na szłapach niy mogła ustoć ,to trza jom boło drab zaszlachtuwać. Łod tego boł szpecjalny chop co sie zwoł masorz Achtelik i mioł nos cerwony jak tomata na podzim. Tymu masarzowi do tych mecyjow masarskich trza boło roztomaitych norzędzi. Nojważniejszo to boła kista piwa jasnego,potym rubo sznora,łorcyk,siekyra i casym knara (tako na sztrom abo na patrony), łostre dudloki,sroge koryto abo waniynka i wiela,wiela gorki wody. Jak juz Łociec z Achtelikym byli po poru lagach jasnego,to sie wziyni za ta krwawo robota. Jo mioł ta świnia wachuwać we chlywiku, ale mi uciykła na plac i......... i wtyncos sie zacła fajno zabawa! Jak wyskocoła na plac i spomiarkuwała tego masarza Achtelika, to ruszoła w cug. Wygonioła ze placu wszystke kury,tego kurzigo pułkownika-kokota i styry masne hyndyki. Wszystko pitło do somsiadowego zegrodka,kaj boły fajne byjty ze sznitlochym,blumkołlym, welśkrautym i radiskami. Coby sie somsiedzko zgoda niy zasrała,to musieli my te ptocyska pochytać drab i pozawiyrać we chlywiku. Juz po godzinie mieli my te wszystke kurziska,dwa hyndyki i z rozpędu dwie somsiadowe kacki. Kokot skocoł na pot,potym na dach i siedzioł tam zlękniony bez dwa dni, zaś styry hyndyki poszły w kurs na hołdy. Jak nom Matulka łopatrzyli skalicone kolana,łokcie i gowy, to my byli ganc gotowi do dalszego świniobicio. W casie jak my lotali za tymi ptocyskami, to świnia wparzoła do siyni,przewrocioła dziyżka z nociastkym,masielnica tyz i chłeptała fajno maślonka , ze wtory miało być masło na torg. Łociec z Achtelikym łobciągli bez tyn cos pora lagerkow jasnego i....... i natyncos nadjechoł Ujek Hanek na kole (co Matulka dobrze przewidzieli łonski tydziyń). Godali Matulka,co zawsze go diobli nadajom jak jest coś do zezuchlanio abo szlukanio.(Wiedziała co godo, bo to przeca jejich bracik). Teroz to my byli juz festelno zgraja i byle świnie sie niy ulęknymy. Boło nos,porachujcie: Łociec,Achtelik,Matulka,Ujek Hanek, jo z bracikami i nasze trzi dziołchy. Toz my sopli za tom świniom! Łona jednak boła mondrzejszo łod nos, boła tyz drabszo niż my. Wele studnie to zakręcioła fest w lewo,kole gnotka w prawo i to tak łostro, że Matulka padli pyskym na twarz do marasu! Potym zrobioła piytnoście rondek po placu i lygła we chlywiku (ta świnia niy Matulka). My podali jak muchy na podzim. Łociec nom kozali zrobić pauza, coby świnia sie uspokojoła a łon mog ze Achtelikym i Ujkym Hankym łobalić po dwie lagi jasnego. Ujek Hanek to mioł take smacysko na te jasne,ze az wardzysko wisiało mu do kolan. My zaś poszli na kwilka do pomiyszkanio posuchać jak Matulka sie radujom ze stargany jakle i ze spaskudzony kecki. Po pauzie wziyni my sie zaś za ta świnia,wtoro w tym casie dorwała sie do kastrola ze nudlami co sie chodzioły na łobiod. Starosek niy broł udziału we tym gonie,ino bakoł faja i spluwoł do szpugnapa a siedzioł za łoknym ze kuchnie.Dorodzoł nom ino,by my to robiyli ze lepszym intusym. No toz my bez ta dorada ustawiyli sie w kołko ze świniom w pojszczotku. Moje dwa braciki : Hajnel i Gregor,nabrali szwongu,ciepli sie na ta świnia i... i po kwilce byli juz w gnojoku. Zostali wyeliminuwani ze gry, bo ich boło cuć a wiycie,że świnie tego niy ciyrpiom. Po poru rondkach po placu masorz Achtelik dostoł sapka,zachacoł szłapom ło stary gysztel ze koła i strzaskoł sie pysk, abo gymba,coby fajnie pedzieć. Krew mu purskała ze kichola az jedna uciecha. Łociec jednak boł nojlepszy,bo dopod ta świnia i rajtuwoł na ni jak jakiż grof na koniu. Juz,juz sie zdowało,że bydzie szło na lepsze,ale jak świnia wparzoła do stodoły,to sie te "par cour" skońcoło, bo Łociec łebym polnoł we tako sztanga łod dświyrzi i kopyrtnoł na klepisko jak dugi. Świnia zaś wciamrała sie do siana we stodole i zażywała zasużonego łodpocynku. Co ji sie po prowdzie noleżało. Na tym sie skońcoło te sławetne świniobicie. Masarzowi Achtelikowi boło bardzo ciężko pić piwsko, bo mioł pysk spuchnięty jak bania. Łociec zaś niy mog patrzeć na ta świnia ani na nos, bo mioł ślypie popuchnięte, toz cołko nadzieja boła w tym Ujku Hanku i łon te piwsko skońcoł, bo by skisło na amyn. Jednak sie tyn Ujek Hanek na coś przidoł. Jo w nocy z tego świniobicio mioł piyknisty śnik. Śnioły mi sie krupnioki i żymloki kompane we tusty zupie ze welflajszym,potym śnioł mi sie preswuszt łokrągly jak miesiącek na niebie,fajne leberki a nad gowom to mi lotały cołke krance wusztu. Zas świnia to we tym mojym śniku siedziała na pocie i grała na krzipce. dwa dni żech sie łoblizuwoł jak buks po leberach cego i Wom piyknie życa!! Jerzy Komor vel Jorguś Rzympoła

powrót :: strona główna

Listek do ciotki w Efie Drogo Ciotko Gryjto! Pisecie cobyście nos chcieli latoś byzuchować jak pojedziecie na freudschaft reise i pytocie sie cy my momy waronki. Toz Wom łodpisuja , że możecie do nos besuchować , bo nasze pomiyszkanie to strzimie.Mieszkomy się jak jakeś grofy we familoku we einzli we giblu z niykrępującymi wyńściami na dwie strony. To jest na góra kaj suszymy pranie i na dach bez klapa kaj zażywomy świerzego luftu i słonecznych kąpieli. Jak my się łonskigo lata łopolali , to nasze dwie cery się przilepioły do tery i musiołech lecieć po szery. We einzli momy doś przestronnie , jak przijedziecie ze Ujkym Heinkym , Hyjdlom i Tereskom to my się ino trocha przekulnymy pod ściana i bydzie plac.Koza się przipnie za śrankym wele wertika ,kroliki pochytom i wraza do waszkorba by się Wom pod nogami niy belontały zaś kota i Azorka wrazymy do sztandura wtory i tak niy chodzi ,bo nasz Zeflik przedoł gywichty na szrocie.To już potym bydziecie sie mogli wysztrekuwać na szizlongu i kożde z Wos może leżeć na dowolnie wybranym boku.Acha nogi to musicie wrazić do waszmaszyny , bo jak mocie szweisfus to koza by Wos jynzykym łechtała co trocha przeszkodzo w spaniu.Gołymbi to na tyn cos Waszego byzuchu niy bydzie we izbie bo gynau som flugi. Niy bydzie Wom u nos biydy bo momy nakisony cołki bonclok zuru i nasuszony chlyb na wodzionka.We szpajzyśranku jak wymna śniego cołki mój wercojg to się zmieści te piwo wtore prziwieziecie.Waronki higyniczne tyz momy dobre bo ajmerek za forchangym jest dwa razy w tydniu wylywany do rynny a na grubszo rzec sie pudziecie na Banhow wele wtorego miyszkomy blisko.Ze badywanny się wyciepnie cołki wągiel i bydziecie się mogli kompać wiela dusza zapragnie ino mi się zepsuła połautomatyczno brauza bo łod giskany urwoł się hynkel i jest trocha dziurawo. Wiym ,ze Wy tam za granicom niy mocie tych wygod toz się u nos na urlaupie trocha pomaścicie i bydziecie się żyć jak jakeś grofy. Toz przijyzdzejcie jak nojprędzy a jak mocie jakeś gyszynki to się weźcie je ze sobom bo nom tu nic niy brakuje ale nom się tu przidajom. Jak mocie trocha na ibrich tych nowych eurikow to je tyz prziwieźcie bo na handlu fajnie je idzie przedać i trocha grosza polskigo tyz Wom się przido jak Wos zaprosza do szynku na piwo z oplerkami. Konca już tyn listek bo niy mom już papioru ( koza go zezarła ) Przijyzdzejcie drabko bo moje dziecyska już łod tydnia wystowajom na Banhowie coby Wos we śląski ziymi sercym prziwitać i pomoż przeniyś kofry z gyszynkami Do miyłego herzlich wilkomen Francek Fyrtok

powrót :: strona główna

Jak żech sie na muzyka rychtuwoł Powiym Wom moi roztomili jak żech sie na muzyka za kawalerskich casow wybiyroł ze mojom lipstom Trudlom a boło to we karnawale roku pańskigo... niy tego niy powiym, bo sie porachujecie wiela tyz to moga mieć lot a mom ich... no przyńdźmy do sprawy. Tak ongyfer boło to przed mojom żyniackom i bołech wtedy mody i niypiykny jako i dziś, ale to do rzecyniy przinoleży. Miyszkołech we takym familoku co sie teroz blokym nazywo , co mi sie nic a nic niy podobo, bo bloki mi sie inacy i smutni kojarzom. Ancug wisioł wypucuwany na biglu we śranku, halbki wyglancuwane stoły wele nachtiszla, ślips wisioł na krołnlojchtrze a jo sie goloł na glanc przed trocha świdratym zdrzadełkym. Coby sie wprawić w dobro sztima karnawałowo, toch sie gwizdoł na przemian z mojym cyzym tanzszlagry i łod casu do casu szlukołech sie ze lagerki jasnego piwka. Noroz wtoś zazwonioł do dźwiyrzi. - Jezderkusie coz robić? Bołech ganc goły, jak to przi golyniu - wiycie? Myślołech, że to moja Trudla juz przilazła mi noprzeciw. Niywiela ponad to myślący, łotwiyrom dźwiyrze. Żodnego niy ma za niymi. Wystawiom chyrtoń za dźwiyrze, gawca w lewo, w prawo. No żodnego niy widza. Noroz zrobioł sie cug i za dupom zatrzasły sie moje dźwiyrze. Jo goły na siyni ino ze brzitwom we ryncysku i z namydlonym pyskym. - Jeronie, coz teroz robić? We pomiyszkaniu przeca żodnego niy ma. Dźwiyrzi brzitwom niy łotworza,bo zomek mom stomiloński, futrziny ze mocnego dębu, zowiase żech niydowno przed złodziejami zasztopuwoł driny bolcami. Nic mi do łeba mondrego niy przichodzioło. We tym momyncie słysza, że z dołu wtoś idzie na wiyrch. Gefnołech bez gelynder - to szli betlyjkorze, bo jak roz boł przeca cas kolynduwanio. - Coz robić? Niy moga dziecyskom tak sie nagi pokozać, bo zgorszynio nasieja na cołko ulica i bydzie łostuda jak diobli. We tym strachu i sztramongu zazwoniołech do moji somsiadki Kowolicki ze nadziejom, że mi pożyco jakiś werkcojg i sie gibko moje dźwiyrze łotworza. Zwonia, zwonia i po cwortym zwonku drzwi sie łotworzoły. Jak mie Kowolicka łobocoła - tak padła zymdlono na dylowka we antryju. Jezderkusie, nowo biyda! Co z tom Kowolickom robić? Zawarech dźwiyrze i skocołech do jeji kuchnie po gorcek wody i jom cuca. Przi drugym gorcku mi sie udało i jak łona mie spokopioła wtoch jest, to zrobioła sie blado jak kyjza, żech jom musioł zaniyś na szizlong do izby. Tamech ji wszystko dokumyntnie wytabacoł. Patrzała na mie jak na gupigo. Boła jednak doś pojętno, ale wystowcie sie: co byście zrobiyli, kej by Wom za dźwiyrzami stanoł we ćmoku goły chop ze brzitwom w ryncysku, namydlony i z bardzo gupiom minom? Toz myśla, że byście tyz zymgleli. Poprosiołech Kowolicka ło jakiś szraubyncijer coby sie te moje pietrońske dźwiyrze łotworzić. Kowolicka niy miała żodnego inkszego nocynio ino siekyra we śrancku pod ausgusym. Polozech po nia. Coby jom wyciągnąć z pod tego ausgusa, toch sie musioł siednąć na rycka co wele niego stoła. Przepomniołech blank, że na ty rycce położolech moja brzitwa jagech brol woda do gorcka na cucynie Kowolicki. Ta brzitwa leżała tak maszkytnie, że mi przerzła ta cyńść ciała, wtoro sie wstydza tu pomianuwać. Bołech za kwitka cołki spyrskany krwiom i lola sie łona zymie jak woda z kokotka. Musiołech jednak coś drabko zrobić, bo sytuacjo stowała sie coroz gupszo. Dopodech ta siekyra, wzion z rycki ta niyszczęsno brzitwa i...i we tym momyncie naroz wtoś zazwonioł do dźwiyrzi Kowolicki. Trza łotworzić- myśla drab ? Coby dali niy sioć zgorszynio swojym nagym wyglondym, toch wyciągnoł ze tualetki we antryju szuflodka coby tyn nojwiększy wstyd zakryć. Łotwiyrom dźwiyrze a tam za niymi betlyjkorze. Jak mie łobocyli, pokrwawionego, ze siekyrom i brzitwom w rynce i ze szuflodkom bez dna - cegoch wtedy niy wiedzioł - to sopnyli na słody i haidi uciykli na doł. Jedyn sztok niży zrobioło sie nowe larmo, bo wtoś szoł na wiyrch i dostoł betlyjkom po gowie. Potym sie łokozało, że to boła moja lipstaTrudla, co juz noprowda szła mi no przeciw. Jo juz coroz mni pojmuwol z tego co sie wyprawiało. Jak Trudla łobocoła tyn cołki tyjater; no mie z brzitwom, siekyrom, pokrwawionego i ze romkom zamiast szuflodki niży pępka i posuchała mojigo gupigo godanio, to ji sie gymbusia łotwarła jak klapa z gołębnika. Wzion żech sie wtyncos za te moje dźwiyrze a siekyrom poszło mi to doś gobko. Zaś łod dugszego casu bez dziurka we swoich dźwiyrzach filuwała inkszo moja somsiadka - Lukascycka. Z tego co widziała, zdało ji sie ,że to jest napad i zazwonioła na policyjo. Jak jo juz końcoł łodłupuwanie moich futrzin, to łoni juz byli. Niy byda Wom powtorzoł tego co mi moj dziubecek - znacy Trudla - napyskuwoł, bo to mogom przecytać dziecka i bydzie nowe zgorszynie. Wpodech w taki sztres, żech ino som łobciągnoł halbka i poszolech spać. Dziwuwołech sie rano niypomiemie, cymu moje zdrzadło we antryju jest na wysokości pasa polepione flostrym a sztepdeka cołko we krwi? Jesce chca na koniec pedzieć ,że kejby niy moja Trudla i Kowolicka, tobych do Wielkanocy przesiedzioł we hereście. To by boło tyla ło ty łostudzie. Jerzy Komor vel. Jorguś Rzympoła